Oh, Irog!

Oh, Irog!

 by: Serendipity

Sa higayong nagbangga ang mga bintana sa atong halagdong mga kalag nga aba.

      Nahulog kaning akong musmos nga  

kasingkasing sa oras nga wa ko damha.

Sa kalit may nisuplot nga di ko matahap nga gibati

      Susama sa pagbuswak sa hahumot nga mga buwak sa hamugaway nga kagabii

Sa pantaloon mong Penshoppe, sa sanina mong dilag

      Kaning mga mata kong naggilak-gilak, sa imong postura nabihag

Sa halayo sa ganing dapit namatikdan ko dayon ang makasilaw mong kaanyag

      Maisama sa mga bituon sa awa-aw’ng langit nga nagpasundayag sa igong kahayag

Irog ko! Wa gayud ako nasayod nga ang sama sa imo mutugsad sa akong kinabuhi

      Ikaw ang anghel sa akong mga   pag-ampo nga gipadala diri sa yuta arun ipaalimadmad

      sa akoa nga aduna diay ako’y bili

Ikaw ang suga nga naghatag kinabuhi sa kasingkasing kong mangitngit

      Gatubod kaning panudlanan ko sa gugmang ga-urus-uros ug hingpit

Ikaw ang nagkadaiyang malipayong kolor nga nabulit sa akong kinabuhing gibukutan sa

       kasubo ug kalaay

Di gayud nako makalimtan ang mga lihok mong naghaw-as kanako gikan sa  

       nagkaguliyang nga mga pagbati padung sa hatam-is nga kalipay

Gihigugma ko, gipasundayag mo sa akoa kung unsa mahigugma

      Nga sama sa usa ka langgam nga masadyaong naglupad-lupad sa halapad nga  

      kawanangan mahuman makagawas sa mahinuklugong hawla

Wa gayu’y mabulaklakong mga pulong o panultihon ang masibo sa tukmang pagbating   

      nasayod niining akong kasingkasing

Mahudyakang naglukso ning nagkadaiyang parte niining akong halangdon nga lawas sa  

      higayong ikaw mahaduol sa akong piling

Unsang gayuma ang hatod mo sa akoa nga sa huna-huna dili ikaw mawala

      Unsa’y anaa kanimu nga ang imung nawong permi nakong makita ug dili intawon  

      mapapa

Mga hulagway sa akong huna-huna masantop sa tuwina hangtod sa naabot ang punto 

      nga mukontra na ang tanang gipanamkon sa langit ug sa yuta

Sa mga kagusto ni Mama ug ni Papa wala gayud ikaw apila maong ako nalubog sa  

      makalumos nga kabalaka ug napabayaan apil ang pag-eskwela.

Gigapos man ako sa makatuok nga kalibog sa ideyang nganung mukontra man sila sa  

      akong gugma diha sa imua.

Wa ba sila nasayod sa gibati kong di makaya?

      Bisag unsaon nila ug suling-suling sulod sa akong alimpatakan ug paghusga nga 

      ako nasaniban na ug impakto.

Kay kabalo ako nga kung sa ilang mga mga kalimutaw dili kani tama pero mao kini 

      ang nahibal-an kong gitugot nga sakto.

Pipila ka mga adlaw nga ni tugsad ug bulan nga ako nag-amuma niining akong  

      makasubong  pagbati.

Magalupad sa wanang ang utok ko samtang lawasnong anaa ako sa klasrum, sa balay, 

      sa tindahan, sa library, ug sa parke.

Apan sa wala nagdugay….

      Gitamparos ako sa kamatuorang tinud-anay

Namata ang dughan ko nga ako- ug bugtong AKO lang- ang nag-ilusyon ug sa gugma 

      natung duha AKO ra’y nasayud.

O makahinuklog pamalandungon, makapunder bation ang paghampak sa kamatuoran \

      nga ang akong mga damgo para natong duha di na masunod.

Naalimadmaran ako nga sakto ra gayud si Mama ug si Papa

      Wa pa gayud diay kaayuhan para sa kadaghanan ang pagpasundayag ug pagsunod 

sa gugma samtang ako sa pangidarun bata pa.

Namatikdan ko kini nang akong mga suod nga higala

      Nakadiaya na’g palayo ug sa akong palibot di na mahagap kay daw ang saunang 

      AKO sa kalit lang nawala

Ug karon- karon lang gyud- ako napukaw

      Mura’g gitugsad ako sa di matugkad nga malalum ug matugnaw nga tubig sa kaulaw

Bisan ug magkaingon,.. dako pa gihapon ko ug pasalamat diha sa imua O, Irog ko!

      Kay gitudluan mo nga magmahal sa wala’y gitagad nga balos ang kasingkasing ko.

Kay gipasakay mo ako sa pako sa paglaum

      Di tika makalimtan bisan sa mga kagab-ihong giputos sa kangitngit ug kabugnaw, 

ako gihapon sa imu nagdahum.

Bisan u gang tanan kay produkto lamang sa batan-ong imahinasyon

      Paningkamutan kong di ka makasagabal bagkus himuon ka nakong inspirasyon

Inspirasyon arun sa pagkab-ot sa akong mga pangandoy ug mga balakon

      Kay ikaw, Minahal ko, ang nag-inusarang gidahom kong bituon

Kung dili karon, dili ugma, ug dili man gani sa mga umalabot nga bulang gitakna

      Magtinarong na gayud ako sa pag-eskwela aron sa panahong musapit nga itugot 

kita magkita, masampit na jud sa imuang matam-is nga ngabil, “Kita gitadhana!”